https://www.facebook.com/MoroccoTravelAgencySARL

فتيل القنديل

كنال تطوان / الشاعرة : كريمة العاقل

بشفار عيني نذبح سكات
سوادك يا سما
ننقش الافراح على وجه الما
تغلي برغوة زبادك حرف وكلمة
تنزل للقاع الغارق ترقد ردمة
تتوغل ف خيوط شباك الضيق مغشمة
ملقا فيها الغطاس كيف يزول
غيارا من العتمة
ويعاليها فوق تضوي نجمة
مال المجدف على المركب
وخبل حبال شراعا
هاجت معاها الامواج
حارت كيف تحكما
بكلمة هنا وهناك وتما
نبتات عروقا على حجر الصامة
تسقات بساقية ميدمة
لا محرات ظفارو وشما
ولا غبار على جبينا ترما
عرشات بوراق الدكار
وف غلتا عمرا ما تعطيك النعمة
هاك اللقمة مشات اللقمة
جات النقمة
علاش يا الايام تخبي
زين الافراح وتلتما
والليل قرب يمشط نهارو
ويدلي سوالفوا على هد السما
يزين خصلة منو بقمرة
فيها الهايم عشقا بنظرة
سكون الليل والقمرة تما
وضو القنيدل فتيلو تعما
ما بقات غير الظلمة
تضوي على الظلمة
تخوف هد الظلمة
تقلشات مع الاحزان
تضفر الكية ببكمة
غشمت روحي وزلجت هموما
رخاما
تبرد الحسرة وتطفي
النار ال هنا قارمة
تندق في مهراز الزهار
مع وراق الحنة الكارمة
تعصر احلاما
تعرق فتيلا
و تطبخ ظلاما
الفرحة تحرقات ونسمات ضياما
الزيت سال واللسان تقال
وفتيل القنيدل ما بقا يشعال
نورو تطفى وتغير الحال
آه……يا يما
القنديل ما نور اليوم يا يما
بقا ظلامو يبكي هنا وهنا
وفي هد المكان يا يما
لمن نشكي ولمن نبكي
والقنديل راح غير مكانو ال عليه يحكي
علاش فطمتيني منك يا يما
وخلتيني نكبر
علاش ما خلتيني صغيرة بين ذراعك
وتقلي تعلم تصبر
والدنيا مزود تلفح بالجمر
معرفت فيها القريب من الغريب
ولا العدو من الحبيب
كلشي ف قصعة واحدة معجون
بالمحبة والغدر
بالبسمة تخمر
وبالدمعة تخمر
ومطراح لوحو راشي
ميقنع قوت مولاها
ال عندو ماشي
راه كلشي بالصبر
و راه
كلشي مكتاب ومقدر
خليني معك يا يما
خليني في حضانك يا يما
نسمع دقات قلبك
ونحس بامان وهنا يا يما
خليني ف حضانك ما بغات حضاني
لغيرك ترما
يا يما خليني يا يما
وها القنديل وفتيلو تسالا
والاوجاع معاه لبسات دربالة
نرقعا بخيوط الصبر
ونقول مكتابا جالا
نلقا خيط محمل المخيط
وبانت الترقيعة ومشا جمالا
ولون الخيط وزينو تبالا
يا مكتابي يا ايامي
شوفو نفسي شنو جرالا
من راح فتيلك يا القنديل
ما بقا لحياتي معنى يا الخليل
مبقا شكون يونس معايا
هد الخوف الهبيل
نهز راسي نرفعو للسما
ندعي للسميع الجليل
والدموع من عيني تسيل وتسيل
حيت في ضوك يا الخليل
كان الدفا
وكانت الاحزان معايا تالفة
آه يا الفتيل…
آه يا القنديل…
آه يا الخليل…
الضربة قوية
تكوي كوية
ضربة مورا ضربة
ماشي سهلة عليا هد القلبة.
نبات نقرشل الليل
يمكن ترطاب خيوطو
صباح جميل
وعاود نتفكرك يا الخليل
ونعالي راسي فوق تما
والله
من بالي وخيالي مننساك
وعهدي ندعيك بالرحمة
يا الخليل
يا فتيل القنديل .

رأيان حول “فتيل القنديل”

أضف تعليق

هذا الموقع يستخدم Akismet للحدّ من التعليقات المزعجة والغير مرغوبة. تعرّف على كيفية معالجة بيانات تعليقك.